喜鵲訪曼城有禮收

猪拉多纳

(六)50 曼城 VS 紐卡素

今輪英超重頭戲，衞冕嘅曼城主場迎戰「喜鵲」紐卡素，曼城早前一度經歷五場不勝，依家畀榜首車路士甩開7分，衞冕形勢唔多樂觀，嚟緊周中歐聯仲要硬撼巴塞，對紐卡素嘅聯賽或會有所保留，撐「喜鵲」讓球客勝有着數。

（now 621周日凌晨1時30分直播）

「藍月亮」曼城喺聯賽榜落後「一哥」車路士7分，想後上封王談何容易，況且佢哋之前三季已兩奪英超冠軍，高層自不然將注意力投放喺歐聯，以求有所突破。睇番嚟緊周中歐聯16強首回合，喺主場硬撼弗到爆嘅西甲班霸巴塞隆拿，就算夫添出擊都未必應付得嚟，所以今仗唔排除曼城主帥比歷連尼會收起阿古路同中場核心耶耶托尼，等佢哋養精蓄銳搏殺。如果收起阿古路的話，曼城好大機會讓剛以2,800萬鎊加盟嘅冬窗標王韋菲特邦尼處子登場，不過呢位科特迪瓦前鋒初嚟甫到，未必即刻適應「藍月亮」戰術體系，另外兩位前鋒迪斯高及祖維迪又狀態低迷，隨時令進攻死火。
紐卡素助教坐正穩定軍心

紐卡素自一月尾正式宣布助教卡華可教到今季季尾後，立即起到穩定軍心作用，近三仗取得一勝兩和不敗佳績，而且今季曾於聯賽盃作客贏過曼城，絕對唔赦心繫歐聯嘅「藍月亮」，有得受讓咁筍，3.8倍嘅讓球客勝有買趁早。