車仔開火重擊般尼

猪拉多纳

(六)13 車路士 VS 般尼

英超榜首車路士主場鬥般尼，車仔近期經常踢「消極足球」，射門少得可憐，但要留意當中對手包括利物浦、曼城、巴黎聖日耳門，領隊莫連奴只係貫徹始終「機關算盡」風格，最終亦達到既定目的。今仗對手換為聯賽尾二嘅般尼，相信莫帥會趁勢「放生」一眾進攻球員，畀佢哋壓前數胡，一舒悶氣，尤其係迪亞高哥斯達急於重拾射門鞋，絕對唔會放過般尼，車仔讓兩球，都要讓球主勝。

（now 622周六晚11時直播）
遇尾二般尼盡情數胡

莫連奴往往要求中前場球員參與防守，對強隊時尤其明顯，因而減少咗佢哋攻門機會。有時令呢班頂級進攻球員覺得無癮，但莫帥精於掌握心理，既然今場對弱隊，係時候畀佢哋盡情表演進攻才能，以作安撫。首席射手迪亞高哥斯達坐完3場波監，狀態有所下降，上仗歐聯威力有限，今仗正好攞般尼當靶，希望盡快入番波。般尼係現時英超失波最多球隊之一，主場對水晶宮都失3球，今次去到史丹福橋球場，凶多吉少。