巴塞「讓主」益大加

猪拉多纳

「MSN」神鋒組合腳風順

近期狀態大勇嘅巴塞隆拿，今晚喺西甲主場迎戰馬拉加。巴塞踏入2015年後大爆發，聯賽榜已經追至落後榜首皇馬1分，上個月17日內3殺上屆「西甲盟主」馬德里體育會，盡顯超班實力同霸氣，短期內不宜同佢哋作對，就算下周中「地上最強」要喺歐聯硬撼曼城都冇有怕，「-2」照撐巴塞1.62倍「讓主」。

（now632台周六晚11:00直播）
尼馬 美斯6戰入15球

巴塞喺今年愈戰愈勇，各項賽事加埋累積11連勝，由美斯領導嘅鋒線火力全開，尼馬、蘇亞雷斯弗到冇朋友，11場勝仗當中，只有1場對馬體會係小勝1:0，其餘10戰每場最少喪入3粒，尼馬、美斯近6仗炮製咗15個「士哥」，有幾勁唔使再多講，最難得係蘇亞雷斯同隊友愈夾愈熟，「MSN」神鋒組合全面開動，地球上仲有邊隊條防線，可以頂得住佢哋先？

係，雖然巴塞嚟緊歐聯要硬撼曼城，不過佢哋依家同皇馬咬得咁緊，絕對冇留力嘅空間，況且巴塞兵源充足，之前話美斯同教練安歷基不和嘅傳聞亦已經平息，尋日仲有消息話布斯基斯已傾掂同巴塞續約到2019年，成班波Run得咁順兼上下一心，依家真係所向披靡囉！
馬拉加9戰得1勝

另邊廂嘅馬拉加狀態勁曳，近9仗只得1勝，上次作客利雲特都要大敗1:4，本身實力已經唔掂，又明顯不擅客戰，點搞呀？最大鑊嘅，係佢哋件非洲門將卡文尼係神經刀一名，有時可以作出神救，但癲起上黎，輸啲波肉酸到激死你，今晚佢造訪魯營，隨時又會出醜，到時馬拉加只可以講句：「對住神一樣嘅對手，仲有豬一樣嘅隊友！」咁嘅情況，巴塞個「讓主」仲唔係穩如泰山咩！