超攻擊組合 Vs 小禁區之王 飛腳富力派「大」利是

猪拉多纳

亞冠盃分組賽今日開打，日職雄師大阪飛腳喺F組主場迎戰中超「3哥」廣州富力（足智彩譯廣州RF），點睇都似搏錘大戰，1.65倍大係投X首選。

（廣東體育周二晚6:00直播）

論亞冠作戰經驗，唔使講上屆日職盟主飛腳點都豐富過第一次入圍嘅富力，加埋主場之利，飛腳W偏熱可以理解。但係中超球隊呢幾年比較肯投資，外援質素冠絕亞洲之餘，又請埋啲鬼佬教頭揸旗，訓練水平高過以前，整體戰力開始拍得住日、韓勁旅。
宇佐美貴史要破射手紀錄

所以飛腳今日遇着「亞冠新丁」富力，絕對冇權話贏就贏，佢哋唯一比較有把握嘅就係入波，事關飛腳本身屬於日職火力最強一隊，前鋒宇佐美貴史由德國回流之後愈戰愈勇，佢仲自訂一個目標：全季入34球，打破飛腳射手紀錄！而且老將遠藤保仁同倉田秋組成嘅攻擊中場拍檔，响季前訓練表現唔錯，被視為飛腳今季主打嘅「超攻擊組合」。由此可見，先唔論輸贏，飛腳點都會大打進攻足球。

富力嗰邊都唔差，外圍賽作客贏澳職嘅中岸水手3:1贏得清脆，摩洛哥前鋒哈默德係舊年中超銀靴獎得主，素有「小禁區之王」嘅外號．把握能力好強；新加盟嘅前基達菲中場米高靴里路，質素亦唔使懷疑，何況仲有高士曼干查呢個羅馬尼亞教頭Lead住，由外援到主帥都冇蝕畀飛腳，夠晒條件同飛腳鬥入波。何況主隊中場件日本國腳今野泰幸要養傷三、四個星期，冇咗佢嘅飛腳，防線前嘅掃蕩能力打咗折扣，兩隊「合作」開大真係唔奇。