年青人受讓咪走寶

猪拉多纳

愛華頓大把本錢hea踢

歐霸賽程頻密，話咁快今晚又上演32強次回合，肥叔睇中英超分子愛華頓主場對瑞士二哥年青人，「拖肥」今季表現極度反覆，首回合又遙遙領先，仲要讓半一咁多，梗係捧番年青人喇。

（有線64及203台周五凌晨4時05分直播）

睇開呢個專欄嘅讀者，都會發現肥叔唔太鍾意推介歐霸賽事，尤其係分組賽，與金礦般嘅歐聯相比，歐霸始終搞極都搞唔起，同佢哋定位尷尬有關，呢項比賽獎金唔高，轉播費唔多，吸引力自然低，搏老命踢搵得雞碎咁多，難怪被視為雞肋。

有見及此，歐洲足協決定搞搞新意思，如果今屆成功封王嘅球隊，可取得下屆歐聯入場券，咁又唔同講法，即時提升各隊戰意，好似以往多數喺分組賽止步嘅意甲球隊，竟有五隊殺入淘汰賽，果然係見錢開眼。
拖肥3球在手坐定粒六

言歸正傳，肥叔今日推介場次係愛華頓主場對年青人，「拖肥」之前九場僅一敗睇落唔錯，但當中和咗六場，包括日前聯賽幾經辛苦逼和弱旅李斯特城，表現飄忽到暈，佢哋首回合勁搶韁大炒4比1，揸住3粒兼4個作客入球喺手，今仗有權hea踢，初盤「拖肥」要讓半一咁多，不過有高水，看來莊家對佢哋信心麻麻，不妨轉捧對家年青人。