拜仁擺大頭 誓炒科隆

猪拉多纳

聯賽強勢唔玩tiki-taka

德甲獨腳戲拜仁慕尼黑主場迎戰科隆，拜仁歇冬後經過一輪調整期，近期喺聯賽着晒火，近三仗全勝合共轟入16球兼不失一球，近兩仗對漢堡同柏達邦更先後開出「其他贏」波膽，順得交關。球隊暫時冇歐聯牽掛，下周德國盃只係主場對乙組仔布倫瑞克，現階段可以全力應付德甲希望刷新更多紀錄，喺安聯球場出擊唔會留手！科隆近四輪不勝狀態低迷，亦係德甲其中一支鋒力最弱球隊，今晚作客慕尼黑等做炮灰，讓球主客和讓到兩球都冇有怕，照捧拜仁讓球勝。

（有線61及201台周六凌晨3時30分直播）

拜仁近期聯賽走勢強勁，唯一失望賽事係歐聯作客薩克達，該役教練哥迪奧拿採用佢理想中嘅tiki-taka踢法，面對弱旅都排無鋒陣，結果最終悶和收場，賽後哥帥都黑面話有好大改善空間。不過歐聯還歐聯，返到德甲近期頻遇弱旅就順得交關，尤其箭頭羅拔利雲度夫斯基表現爭氣，近兩仗合共取得三個入球外，亦獲多個德國權威網站高度評價，由佢配合長期大勇嘅洛賓，同重拾佳態嘅列貝利，主場出擊的確威力無匹。
科隆死守已被睇通

另一邊廂，科隆近四仗不勝合共只入一球，一味靠守嘅踢法已經逐漸被德甲列強睇通，明知佢哋反擊力有限，防線大部分時間有破壞冇建設，好多球隊對住佢哋都開始壓得更上，令科隆守得更辛苦，防線漏洞明顯比季初多，門將漢恩經常都要力挽狂瀾至減少失球，今仗面對「外星仁」勢必更難捱，如果早段已告落後，隨時會收起主力避免損傷，留力下輪對弗賴堡嘅護級大戰。