卡昂着火作客馬賽大無畏

猪拉多纳

卡昂係近期狀態最弗嘅法甲球隊，兩周前佢哋作客巴黎聖日耳門喺落後兩球劣勢下，憑着人多打人少優勢逼和對手二比二，今周作客挑戰主場王馬賽依然無懼對手，捧1.65倍入球大。

（TVB 302周六凌晨3時30分直播）

卡昂歇冬後七場聯賽五勝一和一負，短短兩個月攞嘅積分仲多過上半季總和，令到佢哋由聯賽榜包尾跳升至現時第十四位。兩周前作客逼和PSG一役，雖然某程度上係靠對手末段少踢兩人而得以連追兩球，不過能喺絕對劣勢下保住不敗走勢，大大增強咗球員嘅比賽信心。上周佢哋喺主場大勝朗斯四比一全民皆攻，踢法進取，其中一月份由波爾多借用嘅阿根廷前鋒伊美利安奴沙拿激活咗前鋒線，令球隊喺對上六場聯賽加埋入咗十七球，面對近期防守頻頻出現漏洞嘅馬賽有把握爭取入球。
馬賽攻強守弱頻失波

馬賽今季曾經造出主場聯賽十一連勝佳績，但上次對住另一支中下游球隊蘭斯卻被逼和二比二宣告斷纜，佢哋連盃賽在內對上十二場比賽只有一場冇失波，聯賽失球數字除咗係聯賽榜前五名中最多，比起中游分子如蒙彼利埃、南特、里爾亦不如，防線畀唔到人信心。如果唔係基格納、阿休、皮耶等前鋒交到貨，馬賽隨時已被踢出爭標行列。今場對賽雙方都係攻強守弱，預計入波唔會少，大盤1.65倍稍熱但勝在穩陣。