拜仁3R齊心屠隆

猪拉多纳

殺得性起 2戰派14蛋！

睇波不嬲都係老少咸宜嘅活動，但今晚準備睇德甲獨腳戲嘅球迷，就要做定心理準備喇，事關呢場波隨時變成「限制級」！拜仁慕尼黑最近極度「殘暴」，喺聯賽接連無情屠殺對手，3R羅拔仔、洛賓同列貝利全部殺得性起，其中喺神射手榜領先嘅洛賓更加係「最兇殘」嗰個，今輪主場實再搵「公羊」科隆做「祭品」，「-2」照捧1.75倍「讓主」！

（有線61及201周六凌晨3:30直播）

拜仁雖然喺歇冬後連續兩輪聯賽失威，好在教頭哥迪奧拿話咁快就調整番隊波，繼兩球淨勝史特加後，最近兩場聯賽仲分別狂炒漢堡8:0同柏達邦6:0，唔單止湯馬士梅拿同馬里奧葛斯個個有入波，就連盛傳同哥帥不和嘅羅拔利雲度夫斯基，近兩場都斬獲3球，配合另外兩個R、洛賓同列貝利，火力勁得人驚！
3大殺手腳風順 洛賓射手榜1哥

拜仁近兩場狂派14隻光蛋後，目前22輪聯賽累積59個入球，睇見個勢頭咁好，拜仁名宿法蘭斯洛夫最近都開聲話，睇好佢哋今季可以刷新球會喺1971/1972年球季攻入101球嘅德甲紀錄喎。咁快講單季入球紀錄似乎早咗啲，倒不如講射手榜形勢仲實際。拜仁翼鋒洛賓近排弗到震，已經連續4場聯賽有入波，合共斬獲6球，一下子以16球殺到上射手榜首位，但禾夫斯堡箭頭巴斯杜斯最近都入波入唔停，面對呢位荷蘭同鄉步步進逼，今場「小飛俠」實趁住腳風順省多兩粒啫！
科隆歇冬後跌Watt 4戰3和1負

另邊廂嘅科隆，呢班波今季勁怪雞，作客攞分仲多過主場，弊在佢哋歇冬後狀態麻麻，近4戰僅得3和1負。再講吖，雖然科隆作客零舍「耍家」，可惜先後對住「二哥」禾夫斯堡同「三哥」慕遜加柏，最後咪又係扯白旗投降，今場造訪安聯球場，對住成班撻着晒嘅拜仁鋒將，真係想輸少當贏都難啦！
盤路解碼

拜仁今季聯賽主場11戰開出8口「入球雙」。
Data King：拜仁地頭場均入3.3球

‧科隆聯賽連開8次「半場和」。

‧拜仁今季聯賽主場11戰入36球，每場平均入3.3球。

‧拜仁近10場聯賽開出8次「角球細」。
好波有得睇（直播以電視台公布為準）

澳職‧墨爾本城 Vs 阿德萊德聯：周五下午4:40‧有線64及203

德甲‧拜仁慕尼黑 Vs 科隆：周六凌晨3:30‧有線61及201、GT

法甲‧馬賽 Vs 卡昂：周六凌晨3:30‧TVB302