飛腳紅鑽細孤力弱

猪拉多纳

季初未撻着又有亞冠後顧

日本波回歸，上季三冠王大阪飛腳今午喺中立場橫濱日產體育場出戰上季聯賽亞軍浦和紅鑽，爭奪日本超級盃，賽事一場過踢90分鐘，賽和即互射12碼決定冠軍誰屬，兩軍雖然係目前日職最強球隊，不過季初階段狀態都曳，近期又忙於應付亞冠盃，呢場高手過招預期入波唔會多，黑柴推介1.85倍細盤。

（有線61及201台周六中午12時35分直播）

日本球隊近季喺亞冠盃成績平平，日本足總季前特別要求列強對今屆亞冠盃加倍重視，希望攞番個彩，點知一開波隊隊都未Ready，四支參戰亞冠球隊，首輪只有柏雷素爾和波，其餘三隊大阪飛腳、浦和紅鑽同鹿島鹿角全部輸波，踢完一輪，死敵南韓傳媒對日職球隊極力嘲諷，相信飛腳同紅鑽喺呢個時候，都會以亞冠為先，飛腳剛於主場全場佔優下吞咗廣州RF兩蛋，今午踢完之後就要即刻啟程，因為三日後亞冠盃要作客南韓對FC城南，絕對唔可以再輸。至於紅鑽啱啱喺南韓輸完返嚟，佢哋喺半場領先下畀水原藍翼反勝，嚟緊下周中又要對澳洲嘅布里斯班獅吼，喺咁緊密賽程下，兩軍都好難全力應付今仗喎！
紅鑽新兵多未磨合

飛腳上季重返日職即橫掃聯賽，聯賽盃及天皇盃三料冠軍，今季人腳變動甚微，主要收購只係上季仙台維加泰首席射手赤嶺真吾，同橫濱水手中場小椋祥平，都係補充兵源性質；至於紅鑽上季喺遙遙領先下都畀飛腳過頭，今季大灑金錢擴軍，一口氣引入咗大宮松鼠箭頭隆比真歷、廣島三箭射手石原直樹同清水心跳翼鋒高木俊幸等三名攻擊好手，不過季初階段仲要時間融入球隊。
高手過招近5屆4次開細

飛腳同紅鑽高手過招，向來謹慎，上季兩度交手，首循環紅鑽作客贏2比0，次循環輪到飛腳作客贏1比0，都係開細盤，加上近五屆日超盃有四屆開入球細，以目前情況睇相信今仗都唔會例外！