悉尼打吡娛賓玩大佢

猪拉多纳

喺今晚德甲爆發多蒙特對史浩克04嘅「魯爾區打吡」之前，晏晝「澳職」就先嚟場「悉尼打吡」，西悉尼流浪者對FC悉尼熱身！講到級數，「悉尼打吡」同「魯爾區打吡」有一大段距離，不過正所謂宿敵見面分外眼紅，碰埋都應該有一定刺激性同睇頭嘅。況且兩隊近期表現穩步上揚，包尾嘅「亞洲王者」「西流」喺亞冠盃刺激下似乎有翻生迹象，FC悉尼亦有史美斯同真高呢對「黃金箭頭」愈戰愈勇，今場玩入球大肯定係明智之選！

（有線64及203周六下午4:30直播）
「西流」借亞冠盃翻生

「西流」依家喺「澳職」包艇，似乎有負上屆「亞冠盃冠軍」之名喎！不過唔知點解佢哋一去返亞冠盃戰場就特別醒神，周中仲作客以3:1擊敗日職勁旅鹿島鹿角，踢出久違嘅代表作，相信呢場勝仗可以大大刺激球員士氣。事實上，「西流」踢咗16場聯賽，到今個月初至攞到第一場勝仗，至今輸咗10場，都輸慣晒啦，又唔使降班，有乜好驚呀！由於後防史柏拉洛域同中場馬迪奧普積克停賽，今場有主場之利，好大機會會以攻代守，更何況早輪簽咗「壞孩子」射手基林布魯特，火力有望進一步加強。

作客嘅FC悉尼近期亦都上晒力，近4場聯賽攞到3勝1和，最大原因係入球能力大爆發，喺呢四場入面，佢哋一共入咗15球！奧地利星級中鋒真高一個人都包辦咗6球啦，新西蘭老將射手史美斯亦連續2場入波，有呢對超級箭頭壓陣，唔憂冇波入啦。不過有得亦有失喎，FC悉尼近4場失咗7球，證明後防麻麻哋咋。睇嚟今場雙方多數都係以入球騷嚟娛賓喇！
頂占筍盤：

西悉尼流浪者（入球大）
有線球彩台主持阿占

電郵：soccer64@cabletv.com.hk

面書球彩專頁：http://fb.com/icable64

PHONE波熱線：1831 678

「球彩直播室」：周六下午4:00至晚上6:30