羅馬對戰旺細再追

猪拉多纳

祖記領放9分唔同你搏

今輪意甲壓軸上演「褪色」榜首之戰，羅馬主場對祖雲達斯，次席羅馬已經落後祖記9分，爭標機會名存實亡，球隊狀態亦低迷，近9次主場出擊，竟然未嘗一勝，冇地利優勢可言，想贏波都有心無力。祖雲達斯中場主力派路同保羅普巴養傷，今場唔輸已有着數，要讓波實在信唔過，寧願揀入球細。

（TVB 301周二凌晨3時45分直播）

羅馬踏入15年，變成「和波專家」，近7場聯賽6場打和，最離譜係早前主場鬥包尾嘅帕爾馬，只能悶和0比0。歸根究柢因為中前場球員唔識入波，最令人費解係會方1月仲將當打射手迪斯度外借畀AC米蘭，搞到更依賴38歲老將托迪數胡，入波數字自然偏低，拍檔謝雲奴今季聯賽只有兩球進帳，亦令人失望。羅馬現時落後太多分，球員難免洩氣，爭勝鬥心成疑。
校炮手派路普巴齊缺陣

祖雲達斯實力高過羅馬，但問題係派路同保羅普巴受傷，令中場頓失指揮官，組織力下降。尤其係保羅普巴今季已有6球進帳，僅次於陣中首席射手泰維斯，若然呢位法國國腳缺陣，祖記入波板斧必然減少。另外，祖雲達斯近5次作客羅馬，踢法都傾向保守，全部開細，而喺形勢上祖記已領先9分，即使今場和波各得1分亦冇壞，根本冇必要同對手搏命，入波更加唔慌多。