FC山東讓波捧唔過

猪拉多纳

全北硬淨+魔鬼球證

今屆亞冠盃中超球隊威水，4支參賽大軍首場分組賽都旗開得勝！不過今日第2輪比賽未必再咁順風順水，尤其係E組「中韓大戰」山東魯能（馬會譯FC山東）主場對全北汽車，魯能面臨重大挑戰，除咗對手實力強橫之外，仲遇上「魔鬼球證」哈辛，讓波有暗湧，寧揀全北汽車讓球客勝。

（now 670周二下午3時30分直播）

公布由哈辛執法後，內地傳媒都為山東擔心，因為佢3次執法中超球隊有份踢嘅亞冠盃賽事，都向中超兵出示紅牌，前屆趕貴州人和守將宮磊出場，又判罰12碼。上屆更誇張，除咗醒咗張紅牌畀北京國安嘅馬季奇，8強首回合廣州恒大作客西悉尼流浪者，更趕晒張琳芃、郜林、教練納比出場，搞到恒大輸波。山東魯能今仗最大「對手」可能係球證哈辛。

除咗球證因素之外，山東魯能上輪僅險勝同組最弱嘅越南球隊平陽3比2，表現麻麻，球會高層亦話仲有好多地方需要改善，今仗能否再全取3分，實屬疑問。
全北汽車曾雙殺山東

南韓勁旅全北汽車雖然上輪只係同日職球隊柏雷素爾互交白卷，但全場控制大局，未能入波實屬可惜。全北踢法相當硬朗，過往亦食住山東魯能，雙方4年前亞冠盃兩次交鋒，全北汽車贏晒，今仗有得受讓抵玩。