3場快車 掀動前4

猪拉多纳

紅魔搗鵲巢吼半和

今晚英超再開快車，隨住上輪修咸頓輸波同利物浦贏波，令爭前4歐聯入場券嘅形勢更激烈，除咗頭兩位車路士同曼城幾乎肯定可以喺下屆繼續玩歐聯之外，由第3嘅阿仙奴至第7嘅熱刺，相差都只係7分，仲有成11周賽事，另外兩張歐聯入場券真係有排爭。今晚有3場對前4排名有好大影響嘅比賽，分別係曼聯作客對紐卡素、熱刺主場對史雲斯，同埋利物浦主場對般尼，大家咪錯過呀！

經過上輪修咸頓不敵西布朗、利物浦勇挫曼城後，令紅軍升上第5位，只差四哥曼聯兩分，聯賽仲有11輪變數好多，紅魔唔好以為攞硬張歐聯入場券。由於前線嘅法卡奧、朗尼、迪馬利亞近期好似撻極都撻唔着，曼聯今晚作客「喜鵲」紐卡素，初段穩陣行先亦屬人之常情，況且佢哋客場出擊半場經常未分高下，斯維力撐半場和。

（now 624周四凌晨3時45分直播）
近12場作客開11次

紅魔領隊尹戈爾一時打三後衞，一時又玩番四人防線，令球員無所適從，最大問題係自從卡域克受傷後，球隊冇咗條能從後場組織進攻嘅「鎖匙」，無論用安達靴里拉、戴利白蘭特定係讓朗尼墮後嚟踢，效果都差強人意，導致末段焗住換入「爆炸頭」費蘭尼，狂斬高波玩「燒味戰術」，就算近7仗贏咗5場，卻換來一致劣評。

由於進攻組織唔暢順，令前場火力大減，天價翼鋒迪馬利亞愈踢愈唔對辦，依家連尹佩斯都傷埋，上仗對新特蘭將朗尼重新移前打前鋒，雖然佢梅開二度，但第一球只係12碼，又同法卡奧唔多夾，各自為戰點會打得好呀。

紐卡素算係比上不足、比下有餘，但今季喺聯賽主場只輸過3次，遇上修咸頓、車路士、利物浦等勁旅，都喺初段玩拉布半場打和，咁啱曼聯近12場作客嘅正式比賽，竟有11仗開出半場和，如今搶前四要緊，紅魔喺前線死火之下，萬一先失波就好惡打，因此作客惟有大踢穩陣波，睇定先食，斯維預計雙方上半場會處於膠着，半場和有2.08倍咪嫌少呀。