PSG摩納哥淡定做細界

猪拉多纳

法國足總盃八強，巴黎聖日耳門（PSG）主場迎戰摩納哥。兩軍剛於聯賽打和0比0，今次主客互調，PSG前鋒伊巴謙莫域繼續坐波監，作客出戰嘅摩納哥料會踢得更保守，波童認為細盤可以續追。

（TVB 302周四凌晨4時直播）

兩軍三日前於聯賽碰頭，PSG喺前鋒伊巴謙莫域停賽嘅情況下作客打和0比0；雖然今次聖日耳門返主場再戰，呢位瑞典神鋒繼續要停賽，要咬入摩納哥仍然有難度。睇番兩軍連盃賽對上十次交手，PSG法定時間從未贏過對手，而且錄得兩和八負劣績，根本毫無優勢可言，咁嘅數據點捧得落呢？
摩軍場均入1粒

摩納哥今季成績咁好全靠一條穩健後防線，講攻力佢哋今季聯賽只入二十六球，平均一場只入一球，反映入球能力較低；貝碧托夫有卡士但欠體力，就算上場聯賽只係後備上陣，連場征戰亦難免有疲態，預計球隊會比上場聯賽踢得更保守。以中位數2.5球計，上述十次對賽共有九次開細盤，今場再追細盤啱數。