FC廣州搵流浪者報仇

猪拉多纳

許家印出動私人機 主力叉足電

亞冠盃H組爆發矚目大戰，上屆盟主西悉尼流浪者主場對前屆冠軍廣州恒大淘寶(足智彩譯：FC廣州)！FC廣州上屆八強被流浪者淘汰，今屆崔護重來，老板之一許家印出動私人飛機載主力飛去澳洲，等各將可以好好休息，球隊剛同巴西前鋒艾傑臣續約四年，呢名射手必演身價，捧FC廣州客勝。

（now 670周三下午4時30分直播）

今仗FC廣州宣傳海報係「曾經跌倒，但從未倒下，因為信念絕不屈服，一切由我主宰！」即係我哋廣東人所講嘅「邊度跌低邊度起番身」，舊年八強作客流浪者諸事不順，開波前竟然大巴拋錨，球員要行去球場，場波又有郜林、張琳芃同當時主教練納比被逐，場波輸0比1，兩回合打成2比2，輸作客入球而出局。

今次分組賽再遇流浪者，FC廣州特別重視，因為機程要九個幾鐘，如果全隊屈埋喺經濟位，體力消耗好大，老板許家印出動私人飛機，載主教練簡拿華路、四名外援球員，以及隊長鄭智、郜林及馮瀟霆等主力直飛澳洲，其他球員則全部坐直航機商務客位，希望空間多啲，休息足夠。酒店方面亦特別考究，上次間酒店雖然已經設備一流，但今次再book過另外一間酒店，希望新酒店帶嚟好運。

此外，FC廣州亦同巴西前鋒艾傑臣於周日續約四年，呢名上季中超以二十八球榮膺神射手及MVP嘅球員，將夥拍上仗射破FC首爾大門嘅列卡度高拉特及阿倫攻堅。
澳洲莊家睇低自己友

流浪者剛於悉尼打吡以3比4不敵FC悉尼，剛仗踢到飛沙劈石，球員耗力不少，今次主場出擊其實並非一定捱打。不過，睇番澳職官方網頁對今場嘅分析，佢哋都唔敢話流浪者高啲，只係推介呢場波膽係1比1。而澳洲多間菠菜公司都睇好FC廣州，Centrebet開出主和客賠率係4.25倍、3.25倍及1.75倍，Tattsbet係4.35倍、3.55倍及1.78倍，當地莊家都畀晒料，今場客W捧得過啦！