北京冇火慢攻出細貨

猪拉多纳

另一支中超代表北京國安（足智彩譯：FC北京）於G組主場迎戰南韓球隊水原藍翼。國安喺西班牙教頭文沙奴帶領下擅踢防守足球，今場佢哋有前鋒菲素拉賀坐波監，面對實力相當嘅藍翼唔會太冒進，捧1.57倍細盤。

（now 670周三晚7時30分直播）

文沙奴喺西甲時代曾執教馬體會、西維爾、馬拉加等多支球隊，去年二月接掌國安後，成功替球隊注入歐洲足球嘅防守意識，令國安成為上季聯賽失波最少嘅球隊，自己亦被選為上季中超最佳教練。從外圍賽贏曼谷玻璃及首輪擊敗布里斯班獅吼所見，國安今屆嘅防守力量進一步加強，不過進攻表現卻未算太突出，對曼谷玻璃入三粒只因對手太弱，上場對獅吼喺補時階段嘅入波則帶幸運成分，今場缺少上場領紅牌要停賽嘅瑞典外援菲素拉賀，面對實力相若嘅藍翼冇明顯優勢。藍翼上仗主場反勝浦和紅鑽，現時三分在手唔使同你急，上場佢哋未失波前進攻唔太銳利，今次作客應會以守行先。
首爾搶W讓得起鹿角

另一場直播H組FC首爾主場對日職鹿島鹿角，鹿角上周主場1比3不敵西悉尼流浪者，狀態明顯未上力，前鋒達維依然有傷續缺陣。FC首爾作客恒大僅負0比1，表現唔太曳，今返主場有力打開勝利之門，主隊讓平半捧上盤。

（now 671周三晚6時30分直播）