日乙開鑼 3雄打骰

猪拉多纳

日乙接住日職於今日開鑼，焦點必屬大阪櫻花呢支上季日職球隊，佢哋保留原有班底包括兩位星級射手科蘭及卡卡奧，喺日乙大超班。千葉市原上季僅於附加賽輸波，同升班資格擦身而過，今季增兵捲土重來氣勢更旺盛。而札幌岡薩多招攬稻本潤一同小野伸二組成「黃金中場」，形成三強鼎立局面。
科蘭留隊櫻花大超班

大阪櫻花上季喺日職排尾二降班，的確令人意外，好在會方成功勸服多位主力留隊，除咗大家熟悉嘅烏拉圭射手科蘭、前德國國腳卡卡奧之外，日本國腳山口螢亦在陣，新季仲借用巴甲球隊費古倫斯中場柏寶泰斯拿，可見會方對於重返日職志在必得。大阪櫻花首仗作客弱隊東京綠茵，正好把握機會打響頭炮，櫻花讓半一照要上盤。

（周日下午3時開賽）
岡薩多組過氣黃金中場

講星味，札幌岡薩多亦唔差得過櫻花，繼上季中途簽下小野伸二後，今季更羅致埋稻本潤一。呢兩位35歲老將同屬日本「黃金一代」，一齊踢過世界盃，兩位亦曾經喺歐洲搵食多年，被譽為日本過去10年最佳中場組合之一，故劍重逢勢必擦出火花。岡薩多頭炮作客小讓櫪木SC，要上盤。

（周日下午3時開賽）
市原捲土重來再衝日職

上季第3位嘅千葉市原喺附加賽決賽不敵山形山神，功虧一簣，球隊今季簽咗斯洛文尼亞國腳比斯尼克，配合曾効力卡坦尼亞嘅射手森本貴幸，市原有力再爭升班。市原今仗作客有3位主力退役嘅長崎成功丸，平手盤要市原。

（周日中午12時開賽）
山葉主力離隊難贏向日葵

另外，上季同樣附加賽敗陣嘅磐田山葉簽下英格蘭國腳保夫萊特，呢位32歲前鋒曾効力史篤城、卡迪夫城、昆士柏流浪等球隊，有一定級數，呢位空中霸王身高1米91，對住亞洲球員好着數。不過山葉兩位名將前鋒遼一及迪臣保保離隊，兩個上季為球隊攻入23球，冇咗佢哋攻力大受打擊，揭幕戰主場讓唔起北九州向日葵半一。

（周日中午12時開賽）