法蘭克福行運一條隆

猪拉多纳

被迫換帥無端端發達

德甲頭場科隆主場迎戰法蘭克福，主守嘅科隆遇上主攻法蘭克福，擺明係一場攻防戰，客軍實力同狀態都勝一籌，可望反客為主佔上風，仲有得受讓值得秤先，黑柴撐法蘭克福下盤。

（有線61及64台周日晚10時30分直播）

法蘭克福大前年回升德甲後喺艾明費帶下表現浮浮沉沉，既冇成績亦未能予人良好印象，到上季季中艾明費向傳媒表示，由於法蘭克福欠缺野心，無法提供財力支持擴軍，佢曾經領軍攞過德甲冠軍嘅史特加又向佢招手，於是決心「拋棄」法蘭克福。法福被迫換帥，換嚟賦閒在家，曾經効力不來梅41年嘅「忠臣」舒哈夫代替，雖然好多人喜歡佢嘅有前冇後踢法，但對佢有冇能力教好第二隊仍然有唔少懷疑。
舒哈夫領軍有勇有謀

踏入今季件事愈嚟愈有趣，舒哈夫帶領嘅法蘭克福不但貫徹佢嘅瘋狂進攻模式，而且既睇得又打得，目前排聯賽第八位，比預期更理想，而且睇到舒哈夫變得更加有勇有謀，佢季初頭三輪將球隊領袖美亞放喺後備席，令法蘭克福球迷嘩然，但舒哈夫話美亞當時狀態唔好，勉強上陣對佢根本冇益，結果美亞狀態循序漸進愈踢愈好，到依家簡直去到巔峰，呢位32歲高齡球員至今已取得16個入球，僅次於拜仁洛賓列射手榜次席，足見舒哈夫嘅安排相當正確。而另一邊廂，拋棄法蘭克福嘅艾明費帶領史特加一無是處，去年十一月底已經被炒，法蘭克福無端端發達，真係多得艾明費嘅拋棄。
科隆態沉攻守皆失色

法蘭克福近況出色，除咗美亞大爆發外，另一攻擊手史提芬艾格拿亦勇達巔峰，今仗球隊更有防線領袖森拜奴同今季最貴收購，已取得七個入球同六個助攻嘅施費洛域雙雙停滿復出，回復夫添出擊；相反科隆已經連續六輪不勝，啱啱德國盃亦輸埋畀弗賴堡出局，教練史托卡承認球隊面臨壓力，但佢哋攻力疲弱，連一向強項防守亦比季初失色，加上主場成績向差，一班麻煩球迷令佢哋無法安心喺主場比賽，根本冇本錢讓法蘭克福。