紐約城受讓着數多

猪拉多纳

韋拿卡卡對決全美矚目

啱啱開鑼嘅美職星光熠熠，首輪即有兩支矚目新軍正面交鋒，由奧蘭多城主場硬撼紐約城，奧軍有前世界足球先生卡卡擔大旗，紐約城更邀得「鬥牛國」史上最佳射手韋拿加盟，志切升呢成為美職曼城，呢對星級對手由西班牙國家打吡鬥到去美利堅，一定精彩到暈，紐約城有得受讓堅筍，斯維認為讓球客勝咪錯過。

（周一清晨5時開賽）

新一季美職於昨晨正式拉開戰幔，自從2007年「萬人迷」碧咸空降洛杉磯銀河後，令美職受歡迎程度大大提升，很多球星如亨利、尼斯達、迪華奧、羅比堅尼等，亦相繼嚟掘金。

講到今季美職最矚目球隊，唔係上屆總冠軍洛杉磯銀河或傳統勁旅紐約紅牛，而係兩支新軍奧蘭多城同紐約城。奧蘭多城重金禮聘巴西靚佬球星卡卡最為吸睛，雖然呢位前世界足球先生効力皇馬時被C朗食住，但其級數喺美職仍屬超班，近日更被委任為隊長，而喺球星效應下，奧蘭多城首戰主場對紐約城已經賣出6萬幾張波飛，即係話今場肯定爆棚。
奧蘭多城友賽表現曳

另一邊廂紐約城未開咧已先聲奪人，接連簽入韋拿同林柏特，雖然暫時外借畀曼城嘅「林伯」要7月先歸隊，惹來滿城風雨，但呢班波嘅幕後老闆，正正係曼城班主文梳亞，佢致力將紐約城打造為美職曼城，正所謂有錢使得鬼推磨，單係請到西班牙國家隊史上最佳射手、曾効力巴塞嘅前鋒韋拿，就睇得出佢野心勃勃。

今仗卡卡大戰韋拿，星味極濃，淨係呢對西班牙國家打吡對手大鬥法已夠晒吸引。當然揀波唔可以齋睇球星，奧蘭多城近四場正式熱身賽未贏過，其他隊友質素麻麻，卡卡好難單天保至尊，邊有本錢讓波呢？寧捧受讓嘅紐約城讓球客勝。