馬體會兵疲冇力捉蝙蝠

猪拉多纳

今晚西甲有場唔錯戲碼，由第3位嘅馬德里體育會主場迎戰第4位嘅華倫西亞。馬體會近月惡戰連場，早前歐聯先作客利華古遜輸波，上個禮拜聯賽到訪西維爾喺全場處於劣勢下執番1分，加埋今年對巴塞、皇馬5度大戰，球員明顯疲態畢露，今晚對住狀態大勇嘅「蝙蝠兵團」，唔似攞得晒3分喎，一於撐華倫2.3倍「讓客」！

（now632台及TVB13周一凌晨4:00直播）
華倫翼鋒皮亞堤弗爆

馬體會近4仗錄得1勝1和2負，除咗主場贏榜下游艾美利亞嗰場攻入3球之外，其餘3仗均未能取得入波，屬較少見嘅現象，畢竟佢哋鋒力有番咁上下，中場佐治高基受傷缺陣或多或少影響班波嘅效率，但最令人擔心係征戰頻繁，球員體力開始頂唔順。鑑於「床單兵團」板櫈深度唔夠，好似隊長基比同前鋒嘅基沙文出勤率極高，過去兩個月喺西班牙盃同聯賽5戰皇馬、巴塞後，成班波似乎去得太盡要回氣，近期演出跌晒Watt，今晚對實力差唔多嘅華倫，難言穩勝。

另邊廂嘅華倫西亞近4仗全勝，要數狀態最好一定係翼鋒嘅皮亞堤，此子近4仗交出4個「士哥」弗到漏，而且今季唔使兼顧歐洲賽，班球員有足夠時間休息，加上目標鮮明力爭前4，攞番失落兩季嘅歐聯入場券，今晚對住聯賽只係多佢哋1分嘅馬體會，就算作客都有力坐和望贏。