車仔 PSG細均力敵

猪拉多纳

師徒對決玩穩守突擊
歐聯16強次回合 周四凌晨3:45

今晚歐聯16強次回合生死戰，車路士主場迎戰巴黎聖日耳門（PSG）全球矚目，首回合雙方踢成1:1，車仔今仗只要賽和0:0亦可進身8強，呢隊波防守一向耍家，作客嘅PSG亦係守優於攻，今場或只求偷雞贏1粒，既然雙方勢均力敵，1.62倍「入球細」應該幾穩陣喎。

（有線61、64、201、203及中央5台周四凌晨3:45直播）

聖日耳門王牌伊巴謙喺國米同車仔領隊莫連奴合作過，對莫帥相當拜服，呢場師徒對決睇頭十足。論近況，車仔依家喺英超排榜首，比次席嘅曼城踢少1場但就多5分，早前更擊敗熱刺捧聯賽盃，向3冠王目標進發。眾所周知，車仔後防一向穩健，泰利同加利卡希爾大賽經驗豐富，門將泰拔高圖爾斯首回合演出神勇，今晚隨時令PSG食白果。
揸住作客入球 藍戰士睇定嚟食

「藍戰士」最大問題係前鋒迪亞高哥斯達傷愈後狀態麻麻，仲未揾番射門鞋，呢位西班牙射手對上一次入波已經係1月中嘅事，既然佢哋有粒作客入球揸手，相信老謀深算嘅莫連奴會將今場重點放喺防守方面，雙方要拎「士哥」自然難上加難。
盧卡斯洛迪古斯養傷 PSG創造力減

喺法甲排緊第2位嘅巴黎聖日耳門，今場入唔到波就冇得出線，佢哋擁有伊巴謙莫域同卡雲尼等入波能手，只要把握一次機會就足以晉級，所以今場作客亦唔會輕言搶攻，況且盧卡斯洛迪古斯養傷令創造力大減，即使防中卡比耶復出壓陣，頂多只係提高死球入波機會，今場隨時一球定生死，「入球細」可期！

首回合：車客和1:1
盤路解碼

聖日耳門今季15次出戰盃賽開出9口入球細，細盤率達6成。
歐聯賽制

採主客兩回合制，今輪為16強次回合。兩回合計打和，計算作客入球優惠，未分勝負將於次回合法定時間後加時30分鐘，加時階段仍計作客入球優惠，再和則互射12碼決勝。
Data King：莫連奴恰法蘭西兵

‧車路士領隊莫連奴16次喺歐聯對法國球隊，共錄得11勝4和1負。

‧藍戰士歷來6次主場鬥法國球隊取得4勝2和，而且5次零封對手。

‧車仔翼鋒夏薩特喺今屆歐聯被侵犯28次，為各人之冠。