拜仁火力猛 讓主薩無赦

猪拉多纳

歐聯16強次回合 周四凌晨3:45

歐聯16強次回合大戰連環爆發，「宇宙最強」拜仁慕尼黑今晚喺主場招呼薩克達，「-2」照捧2.3倍「讓球主勝」。首回合兩隊踢成0:0，唔知係咪拜仁作客政局動盪嘅烏克蘭驚到腳仔軟，不過返到主場肯定唔同講法，何況拜仁教頭哥迪奧拿已保證留低，火力全開邊有得擋呀？

（有線62及202周四凌晨3:45直播）

拜仁上個月作客薩克達，全場得1次埋門中目標，令人懷疑佢哋怕咗烏克蘭政局動盪，諗住踢完波即刻鬆人，索性「讓Round」費事搞出大頭佛。雖然拜仁日前喺德甲作客3:1反勝漢諾威有中堅丹迪受傷，中場沙比阿朗素更喺首回合領紅要停賽，但佢哋大把人用，使乜驚呀？
近4場喪轟15球

仲有呀，拜仁射手羅拔利雲度夫斯基、中場舒韋恩史迪加同翼鋒列貝利，上場聯賽只係後備上陣，睇得出教練哥迪奧拿已鋪好路要打沉薩克達，而且近日佢親口證實，唔會喺今個夏天跳槽去曼城，更加唔會返巴塞隆拿，粉碎所有離隊傳聞，足夠谷起拜仁士氣，加埋湯馬士梅拿上仗省兩粒，呢班波近4場喪入15球，唔憂佢哋冇波入喎。
薩克達巴西兵卡士弱

另邊廂嘅薩克達，呢班波似巴西球隊多過烏克蘭球會，首回合竟然可以派6個森巴兵打正選，只得4個後衞同門將唔係巴西出世。不過咁，其實薩克達啲巴西外援卡士唔係特別高，踢得吓嘅中場杜格拉斯哥斯達仲開到口要走人，睇怕陣中都冇乜人想留喺烏克蘭提心吊膽，淨係戰意都輸半條街啦！

首回合：拜客和0:0
盤路解碼

拜仁近13場主場有8次開讓球主勝。