狼堡爆Seed大戰國米3叉戟

猪拉多纳

德甲生還者Show Time

德甲生還者大作戰！歐霸盃16強首回合今晚展開，禾夫斯堡作為德國唯一代表，梗係要守住德甲塊招牌唔可以衰畀人睇。況且前鋒巴斯杜斯喺歇冬後爆Seed，令狼堡今晚主場鬥國際米蘭更具數胡本錢。之但係國米自從梳頓沙基利來投後，佢同莫路伊卡迪、柏拉斯奧組成嘅新三叉戟愈見默契，既然兩隊都咁攻得，1.68倍入球大仲邊走得甩。

（有線61、64、201及203、廣東體育周五凌晨2:00直播）

自從慕遜加柏喺32強畀西維爾淘汰後，禾夫斯堡成為歐霸盃僅餘嘅德甲代表，好在呢支「德甲生還者」抖完冬假後演出勇猛，10仗贏咗7場，當中包括4:1狂數德甲班霸「宇宙仁」。
巴斯杜斯着火 10戰勁入13球

要數最大功臣必要提射手巴斯杜斯，呢位荷蘭射手3年前轉投狼堡後，近年因傷患不斷影響表現，不過上半季入得2球嘅佢喺1月尾爆Seed，10戰轟入13球！佢唔止喺德甲殺得性起，出到歐洲賽一樣咁Sharp醒，上一圈比賽狼堡就憑住佢喺首回合主場2度攻破士砵亭大門晉級，弗到咁今晚隨時又嚟料。

事實上，狼堡喺1月掟咗超過3千萬歐元擴軍，除咗要拎下屆歐聯入場券外，歐霸盃亦係重要目標之一。新兵舒賀爾尼雖然仲未為新東家入波，不過主帥赫基話未驚過，大讚呢位翼鋒卡士十足，入波只係時間問題。又難怪赫基咁淡定嘅，皆因中場卡利古尼近3仗攻入3球腳風勁順，今晚真係大把士哥本錢。
梳頓沙基利國米孭飛 三星作客4戰入8粒

至於作為歐霸盃大戶、5支殺入16強嘅意甲球隊之一，國米雖然近6次作客德國僅得1勝戰績麻麻，但唔代表佢哋冇還擊之力。一對箭頭莫路伊卡迪、柏拉斯奧不單可以各自搵食，喺1月加盟嘅中場梳頓沙基利亦極速融入球隊，並分別喺聯賽同歐霸盃開齋。以呢把新三叉戟近4場作客聯手攻入8球嘅走勢，藍黑軍想攞番粒作客入球唔過分啫。
歐霸盃賽制

採主客兩回合制，今輪為16強首回合。兩回合計打和，計算作客入球優惠，未分勝負將於次回合法定時間後加時30分鐘，加時階段仍計作客入球優惠，再和則互射12碼決勝。
盤路解碼

狼堡今季45戰開出29口入球大，大盤率約64%。
Data King：國米出戰德國唔識贏

‧禾夫斯堡今季17次主場出擊贏13場。

‧國米近6次作客德國球隊僅1勝。

‧狼堡前鋒巴斯杜斯於歇冬後10戰轟入13粒。
乜都玩錦囊：國米作客穿窿捧狼堡

禾夫斯堡今季主場戰績硬淨，就連拜仁嚟到都要輸鑊甘。既然對手國米作客後防多甩漏，連續6場作客失守之餘，當中3仗更至少失2球，睇怕今晚幾難保住不敗，就算受讓半一都唔穩陣，撐1.81倍上盤。