拖肥歐霸搏命讓得起基輔

猪拉多纳

歐霸盃16強首回合有唔少好戲，愛華頓今晚主場對基輔戴拿模，讓平半值得一博。最近愛華頓戰績下沉，但領隊馬天尼斯暗示會放棄聯賽，試問又點會唔搏歐霸盃呀？對家基輔陣容咁殘靠唔住喎！

（有線61及201周五凌晨4:05直播）
基輔殘陣傷兵多　中前場3主力停賽

愛華頓喺英超唔知食錯咩藥，對上12場得1勝4和7負，領隊馬天尼斯都知唔對路，話嚟緊主要目標係護級。又係嘅，現時愛華頓陣中有唔少傷兵，中場巴利跟住對紐卡素又停賽，馬天尼斯咁講，好可能係話畀球迷知，佢要集中火力喺歐霸盃爭晉級，聯賽擺埋一邊先啦！

另一方面，烏克蘭嘅基輔日前喺聯賽作客以1:0擊敗登尼茨克，連贏4場走勢的確好勁，弊在中場謝明蘭斯喺比賽中傷出，搞到傷兵名單進一步擴大。而且佢哋有前鋒耶莫蘭高、中場貝漢達及利波卡坐波監，陣容比愛華頓更殘，淨係靠中鋒馬保卡尼喺前線鬥衝鬥撞，作客好難有乜作為，首回合輸波唔出奇。