史特加鐵桶細守利華

猪拉多纳

救火主帥有後冇前

德甲獨腳戲利華古遜主場迎戰史特加，兩軍近年交手經常出現大交易，但時移世易，利華呢期三線作戰忙到嘔，嚟緊下周三凌晨嘅歐聯大戰明顯係後顧之憂，今晚好難去盡搏殺；史特加踏入2015年七戰未贏過，今場作客對勁旅擺明用鐵桶陣死守求一分，預期入波唔會多，推介有2.05倍嘅細盤。

（有線61及201台周六凌晨3時30分直播）

史特加踏入今年聯賽七戰不勝僅得三分，主要問題係鋒無力，雙箭頭丹尼爾真錫克同伊比斯域一個冇質一個缺態、中場輸血管阿歷山度馬辛踢法太柔、被寄予厚望嘅新星迪姆華拿仍有待成長，最慘仲係向來肯衝肯拚嘅夏歷同多蒙特借將校炮手摩列斯列拿雙雙停賽，球隊上仗主場同哈化柏林合演一場超低水準悶戰，史特加嘅攻勢一啲都唔入肉，救火教頭史堤芬斯喺前線試過晒咁多組合都唔掂，今晚唔敢再貪心，勢必擺鐵桶陣死守博一分。
利華古遜歐聯前戰績極曳

利華古遜目前排喺聯賽榜第四位，為爭下屆歐聯參賽席位，今晚主場迎弱旅當然以三分為目標，不過佢哋賽程緊密，嚟緊三線作戰，下周三凌晨歐聯十六強次回合遠征馬德里撼馬體會，跟住聯賽歐聯資格關鍵戰作客鬥史浩克04，再跟住就會喺德國盃半準決賽主場火併拜仁慕尼黑，呢幾場關鍵大戰太重要，教練羅渣舒密特焗住要小心輪換，尤其歐聯首回合佢哋有一球領先優勢兼冇失作客入球，如果下周中入到馬體會波，就好有機會殺入八強。利華古遜今屆喺歐聯前嘅德甲表現特別曳，由分組賽開始至今，七次踢歐聯之前嘅聯賽錄得一勝四和二負劣績，何況近期雙箭頭傑斯寧同祖斯比迪米斯狀態麻麻，今晚主Ｗ熱到得1.36倍唔值博，捧入球細好過。