槌仔揼廠博第一隊入球

猪拉多纳

(六)24 阿仙奴 VS 韋斯咸

今晚英超另一場倫敦打吡，由阿仙奴主場硬撼「錘仔幫」韋斯咸。阿仙奴主帥雲格嘅「選擇困難症」仲未醫好，嚟緊周中有歐聯後顧下，難免會影響今場部署，而且近年對親韋斯咸，初段經常心不在焉先輸大意波，不妨捧「錘仔幫」第一隊入球。

（now 621周六晚11時直播）
雲格歐聯後顧多嘢諗

阿仙奴領隊雲格係個理想主義者，成季流流長乜盃都想爭，戰線太多搞到球員攰到爆，最終乜盃都冇就當前四係冠軍，好似阿仙奴下周中歐聯16強次回合作客摩納哥，由於首回合輸咗1比3，要翻盤實在好困難，不過以雲格嘅性格一定唔會放棄，今仗對韋斯咸有所保留絕對唔奇。睇番雙方近5次交手，儘管阿仙奴全部贏晒，不過當中有4次竟然係首先失波，上年年尾若非桑治倒戈入靚波卻被誤判詐胡，韋斯咸便5次都先開紀錄。「錘仔幫」趁住上周唔使打足總盃嘅空檔，拉大隊去咗杜拜集訓，有助調整狀態。何況阿仙奴心有旁騖，今仗初段隨時患得患失，畀抖到夠嘅韋斯咸可乘之機，呢場首選「錘仔幫」第一隊入球，但阿仙奴始終剋住對手，預料會驚險反勝，因此買埋入球大啱數。