墨爾本城擊落噴射機

猪拉多纳

出動鋒霸爭入季後賽

澳職話就話5月先踢季後賽，之但係常規賽依家已經踢到第21輪，仲剩返7輪搶分，「邊緣分子」墨爾本城要爭入聯賽前6，喺嚟緊嘅比賽不容有失。今日佢哋主場迎戰包艇嘅紐卡素噴射機，大有機會全取3分，事關客軍已經輸到無欲無求，班球員落到場亦冇火等收工，熱捧墨爾本城1.36倍主W之餘，2.12倍「讓主」亦值得一試。

（有線64及203周六下午4:30直播）
噴射機包艇等收咧

墨爾本城今季大搞，除咗轉名（前身為墨爾本雄心）之外，球會亦使咗唔少錢買人，季初仲搵埋西班牙國腳韋拿返嚟客串踢幾場添，當然唔想連季後賽都入唔到咁失禮啦！

係，雖然愛爾蘭老將杜夫宣布季尾離隊返祖家搵食，不過墨爾本城兵源充足，為咗應付一星期內3場大戰，墨爾本城上仗特別畀「鋒霸」約舒亞堅尼地同中場積臣荷夫曼抖抖，今場波叉足電搏殺，隊長基斯諾保更表明之後嘅比賽，會場場當係決賽咁踢，戰意非常高昂。

相反，踢咗20場波先攞得11分嘅紐卡素噴射機，今季只係贏過1場咁大把，近9戰更錄得4和5負，班球員根本就冇心同你搏，試問仲點幫架噴射機起飛先？門將雲史特坦同守將高般恩又話要繼續養傷，防守力更大打折扣，今日造訪近6仗主場有4勝2和嘅墨爾本城，真係聽抬蛋都得咯！
頂占筍盤：墨爾本城（主勝、讓主）