卡利亞里喪攻踢好玻

猪拉多纳

翻鎅施文享受蜜月期

意甲卡利亞里再換教頭，由3個月前被炒嘅「進攻大師」施文再度接掌，能否護級成功仲未知，但可以肯定嘅係會有一段「蜜月期」，畢竟班球員早就了解施文招牌「433」全攻型戰術，主場對安玻里讓平半，上盤值博。

（TVB301周日凌晨3:45直播）

對意大利足球有一定認識嘅朋友相信唔使多介紹施文，呢位捷克籍教頭教波三十多年，執教過16間球會（其中曾多次翻兜）。雖然冇間球會教得長，但一直對全攻型打法不離不棄，佢嘅性感足球理念娛樂性豐富，當隊波順嘅時候就如沐春風，不過脆弱嘅防守往往為佢被炒埋下伏線。施文執教生涯三十幾年，就係不斷重複呢個宿命，而外界對佢嘅評價亦各走極端。

如果你問我施文能否助排緊尾三嘅卡利亞里護級成功，樂比其實唔係太樂觀，依家嘅情況就好似一對舊情侶重燃愛火，彼此默契仍在，甚至更勝從前，喺復合初期必定如膠似漆，形影不離。但當時間耐咗，兩人之間早前出現嘅問題同摩擦，定必再度浮現，我只能夠講施文同卡利亞里係能夠擦出火花，問題係持續幾耐真係冇人知，所以今場對住實力平庸、戰意一般嘅安玻里都唔捧場，就真係唔知等幾時！
安玻里老鋒線冇作為

安玻里作客成績甚差，全季只贏過1場，對手仲要係包尾嘅帕爾馬。該隊最大殺着就係雙箭頭馬卡朗尼同埋達雲奴，但兩位老人家加埋已超過70歲，活力同體能始終差啲，面對卡利亞里強攻未必發揮到作用。況且意大利足球文化特色之一，就係唔見棺材唔流眼淚，排第13位嘅安玻里領先降班區9分，仲有好大失分空間，所以卡利亞里一定會珍惜呢個搶分機會。
樂比推介：卡利亞里（上盤）