皇馬一肚火 誓炒利雲特

猪拉多纳

剛啱喺歐聯輸波但晉級嘅皇家馬德里，今晚西甲主場出戰利雲特。狀態麻麻嘅皇馬近期慘遭外界批評到體無完膚，今仗面對作客腳軟且近年被「銀河艦隊」食住嘅利雲特，相信有望大勝一仗吐番口烏氣，阿謙相信今場係大炒格，入球大細中位數上調到3.5球都照撐大盤。

（now 632周一凌晨4時直播）

皇馬喺上周中歐聯16強次回合主場竟以3比4不敵德甲史浩克04，幸好首回合贏咗2比0，總算以總比數5比4狼狽過關。不過連續3場不勝，差勁嘅表現難怪令fans非常不滿，更有傳主帥安察洛堤如果喺下周國家打吡輸畀巴塞就會即炒。皇馬一眾戰將為求冧番球迷，加上喺國家打吡前夕要穩住軍心，今仗肯定去盡，球隊目前只有中場占士洛迪古斯一位傷兵，呢場有望大勝一洗頹風。
中位數3.5球照捧大

利雲特上輪聯賽雖然贏波，但作客戰績曳爆，近10次作客3和7負，上次作客面對弱旅華歷簡奴竟然都要輸2比4，今仗更有中場艾雲舒捷斯因傷上陣成疑，加上近年到訪巴拿貝球場都冇運行，呢場不但凶多吉少，且極有可能大敗，入球大細中位數去到3.5球都捧大盤。