衝前3玩歐聯 拿玻里發維保錢途

猪拉多纳

意甲球隊於今屆歐霸盃一改以往懶懶閒作風，表現非常落力，16強霸咗5席，講到尾都係錢作怪，因為歐霸改制後，今屆冠軍可以拿到下屆歐聯入場券，大大提升爭標意欲。尤其係意甲球會近年莫財，更加想靠歐聯搵銀。拿玻里現正全力爭取聯賽三甲位置，確保歐聯入場券，戰意可靠，今晚作客讓維羅納半一，上盤值博。

（TVB 301周一凌晨1時直播）

拿玻里同時亦係歐霸盃16強分子，首回合憑前鋒希古恩個人連入三粒，喺主場領先俄羅斯球隊莫斯科戴拿模3比1，進身8強都算樂觀，但至於能否捧盃言之尚早，想參與下屆歐聯最直接方法，都係攞番個意甲前3位最穩陣。佢哋現時同「老三」拉素同分，只領先第6位森多利亞4分，嚟緊仲要加把勁。

能否參戰歐聯關乎重大經濟利益，相信拿玻里唔會出「蠱惑」玩嘢，今晚作客維羅納勢必搏命。反觀維羅納高不成低不就，連續3場有分落袋之後，就算主場出擊隨時獲利回吐。
科爾多瓦輸到慌捧對家

西甲方面，西維爾近期相當弗，西甲及歐霸盃連場報捷，佢哋情況同拿玻里相似，都係為歐聯席位而戰，今仗主場對實力低一班嘅艾爾切，西維爾炒得起對手。

（now 632及TVB 13周一凌晨2時直播）

另一場西甲由馬拉加主場對包尾大幡科爾多瓦，前者早前作客勇挫「地上最強」巴塞隆拿，位列中上游絕對唔係靠運。相反科爾多瓦已經連輸7場，成班波輸到冇晒信心，初盤馬拉加讓一球相當合理，上盤非常值博。

（周一凌晨零時開賽）