曼聯熱刺大激鬥

猪拉多纳

朗尼撻着 卡尼Red Hot
now621周一凌晨0:00直播

足總盃8強出局，聯賽又落後畀榜首嘅車路士10分，曼聯將連續第2季四大皆空，今季終極目標，唔使問都知係霸住前4，爭取來屆歐聯入場券啦！紅魔今晚會喺主場恭候熱刺，揭開「地獄賽程」戰幔，呢場歐聯門票爭霸戰肯定激烈，曼聯有朗尼重新撻着，熱刺就有哈利卡尼Red Hot，1.75倍入球大梗係要捧啦！
魔童近5戰省4粒

曼聯啱啱喺足總盃8強輸畀阿仙奴出局，一位肯尼亞球迷仲因為咁跳海自殺，證明紅魔今季表現幾令人失望。依家曼聯可以做嘅，就係盡力爭入前4，獲取來屆歐聯參賽資格。佢哋嚟緊幾場波將連環硬撼車路士、曼城同利物浦等勁旅，想開靚個頭重振聲威，今晚絕對唔衰得。

領隊尹戈爾都知自己個位危危哋，賽前向球迷承諾，來季唔會再保守，會大打進攻足球，仲鎖定燕豪芬翼鋒迪比同皇馬「大聖爺」加里夫巴利為夏季收購目標，你話法卡奧同贊奴沙等戰將又點敢懶懶閒先？況且朗尼近5場有4球士哥，「魔童」生猛番，絕對有力撕破熱刺防線。
哈利卡尼冧莊最佳球員

對家熱刺同樣要為前4席位努力，射手哈利卡尼絕對係今季大紅人，冧莊奪得2月份最佳英超球員。佢今季已經有16個聯賽士哥，最得人驚係對上6場作客賽事都有入波，腳風順成咁，紅魔門將迪基亞都未必頂得住。既然大家都要搏，入波唔慌少啦！
乜都玩錦囊：熱刺反彈撐下盤

熱刺失落聯賽盃錦標之後迅速反彈，連環砌低史雲斯同昆士柏流浪，加上呢支倫敦球隊近5次同曼聯交手保持不敗，對上兩次造訪奧脫福亦贏晒，受讓半一咁筍梗要撐下盤啦！
Data King：哈利卡尼作客例入波

‧熱刺射手哈利卡尼連續6場聯賽作客入波。

‧曼聯前鋒朗尼對上8次英超正選鬥熱刺，共射入7球。

‧紅魔連續5次對熱刺不勝。

‧曼聯今季14次聯賽主場出戰贏11場。
盤路解碼

曼聯今季聯賽14仗主場開出10口大，大盤率約71%。