長崎平手盤「薩」無赦

猪拉多纳

日乙 12:00 （日）1 札幌岡薩多 Vs 長崎成功丸

光棍佬教仔便宜莫貪！今日場日乙札幌岡薩多主場對長崎成功丸，無論往績同人腳名氣，札幌都佔晒上風，主勝居然有2.4倍咁好分，筍到似係個氹，呢啲環境都係平手盤博長崎理性一啲。

（開賽時間：周日中午12:00）

計往績，札幌過去4戰長崎取得3勝1和，主場兩戰更加贏晒，其中一場就响今日踢嘅札幌Dome呢個室內場上演，當時札幌亦以2:1勝出。
札幌唔使讓似陷阱

計人腳呢，札幌件玻璃腳小野伸二雖然左膝半月板做咗手術，要2、3個月至出得番，但係新加盟嘅稻本潤一、拿沙列都係前日本國腳或者日乙頂班射手，10號仔宮澤裕樹又傷愈復出，比起不斷靠借人維持戰力嘅長崎，至少高半班波，賽前日本網民所做嘅戰果預測統計，有95巴仙嘅人睇好札幌贏波，就反映到佢哋喺數據上嘅絕對優勢。
長崎客戰6成不敗

問題係札幌Win硬咁款，點解主勝仲有2.4倍咁高回報呢？莫非足智彩大酬賓派米？九叔就唔多信喇，而且長崎呢班波有種特質，就係防守特別堅韌，所以上季出現咗一組特殊數據，佢哋主場唔識攻人，勝率低，和波率就高達48%，出外作客因為多數下風波，反而仲啱佢哋套防守反擊戰術，結果勝率有成33%，加埋29%和波，即係話長崎客戰有近6成機會唔使輸。

事實上長崎今季雖然走咗12件，又加番15個新球員，內裏有5件係借將，但係佢哋响開鑼戰輸畀千葉市原0:1場波，表現一啲都唔失禮，由中場新兵梶川諒太、鋒將李勇宰組成嘅攻擊重心，一度令千葉市原非常頭痛，札幌今場都唔易Win，平手盤揀2倍嘅長崎「客勝」坐和望贏。