撐「狼堡」1.85倍讓主冇死

猪拉多纳

「禁區之狐」巴斯杜斯弗到痹

要數近期德甲最紅嘅荷蘭球員，可能唔少人會話係拜仁王牌洛賓，不過阿占就會投禾夫斯堡射手巴斯杜斯一票！呢位箭頭今年極速彈起，踏入2015年後居然喺7場聯賽喪入11球，入球效率無出其右！「狼堡」今晚喺主場迎戰弗賴堡，巴斯杜斯要爭做神射手肯定唔會留手，贏多幾球開個1.85倍「讓主」相信問題不大！

（有線61、64、201及203周日晚10:30直播）
弗賴堡啞火聽炒

禾夫斯堡上星期意外輸畀奧格斯堡，失埋呢3分已經落後拜仁11分，要後上捧盃幾乎冇乜可能，不過「狼堡」希望保住個「二哥」席位進軍下屆歐聯之餘，亦肯定希望巴斯杜斯可以搶埋個金靴獎！事實上呢班波下半季霸氣十足，當中巴斯杜斯居功至偉，呢位射手係典型「禁區之狐」，今季聯賽13個入波全部喺禁區內攻入，加埋身後有奇雲迪布尼、舒賀爾尼等助攻好手配合，唔憂冇機會入波啦！

相比禾夫斯堡近4戰主場聯賽轟入11球嘅強大火力，對家弗賴堡近6場聯賽有4場食白果，鋒力同「狼堡」蚊髀同牛髀。而且弗賴堡今仗仲有中場主力舒卓斯特累積5面黃牌坐波監，喺咁嘅情況之下，禾夫斯堡可以更加放膽搶攻求大捷，大勝一場唔係難事吖！
頂占筍盤：禾夫斯堡（讓球主勝）