兵工廠絕地反擊 喪攻降摩

猪拉多纳

16強次回合例爆Seed

「兵工廠」絕地反擊戰今晚上演！16強抽籤後被一致睇好可以晉級嘅阿仙奴，首回合主場意外1:3不敵摩納哥，今晚作客最低限度要攻入3球先有機會出線，除咗喪攻之外別無出路。考慮到「兵工廠」近況唔錯，而且近年歐聯例牌喺次回合先發威。既然目標鮮明，出唔出到線都有能力踢出漂亮勝仗，今晚推介廠仔4.1倍「讓球客勝」等睇大反擊！

（有線61、64、201及203周三凌晨3:45直播）
摩納哥法足盃出局

摩納哥首回合係表現較佳嘅一隊，贏波合理，只係大勝戰果令人意外。「瀟灑哥」貝碧托夫首回合有一球進帳，賽後仲大彈阿仙奴後防幾咁唔掂。不過摩納哥嘅銳氣就畀巴黎聖日耳門打沉咗，喺法足盃畀PSG淘汰，即使近2場聯賽都贏波，但今仗抱住唔大敗就出線嘅心態，隨時變成場上發揮嘅負累。

阿仙奴近3屆歐聯嘅命運幾乎一樣︰16強首回合大敗，但次回合就踢出超水準，好似11/12球季首回合0:4慘負AC米蘭，次回合就贏番3:0！12/13球季首回合1:3輸畀拜仁，次回合作客又贏到2:0。上季再鬥拜仁同樣先輸0:2，次回合都打高一皮和波出局，證明阿仙奴特別鍾意「垂死掙扎」。
阿仙奴當弗近8戰7勝

其實「兵工廠」近8場7勝1負，只係輸過畀摩納哥，狀態甚佳。中場大腦辛迪卡索拉上場只係後備登場，復任正選機會高，創造力有保證。

仲有，首回合做敗家仔嘅前鋒基奧特，近4場勁入3球，今晚有力攻破主隊大門。阿仙奴今晚再無包袱，話唔定好似上周史浩克04咁，踢一場轟轟烈烈嘅好波呢！

首回合：摩客勝3:1
歐聯賽制

採主客兩回合制，今輪為16強次回合。兩回合計打和，計算作客入球優惠，未分勝負將於次回合法定時間後加時30分鐘，加時階段仍計作客入球優惠，再和則互射12碼決勝。
盤路解碼

阿仙奴近10場作客攻入20球，平均每場入2球。
Data King：廠仔作客5連單

‧阿仙奴過去10次造訪法國球會取得7勝3和。

‧廠仔近5場作客開晒「入球單」。

‧摩納哥今屆歐聯3戰主場全開「半場和」。
乜都玩錦囊：阿仙奴搶攻博先入波

摩納哥揸住3個作客入球喺手，今晚主場出擊必大踢穩陣波。相反阿仙奴為求絕地反擊，一開波肯定搏盡，咁梗係捧「兵工廠」1.76倍「第一隊入球」啦！
好波有得睇（直播以電視台公布為準）

亞冠盃‧全北汽車 Vs 平陽：周二晚6:00‧now670

亞冠盃‧柏雷素爾 Vs FC山東：周二晚6:00‧CC5

亞冠盃‧廣州RF Vs FC城南：周二晚7:30‧GT

亞協盃‧傑志 Vs 柔佛DT：周二晚8:00‧now670

歐聯‧馬德里體育會 Vs 利華古遜：周三凌晨3:45‧有線62及202、CC5

歐聯‧摩納哥 Vs 阿仙奴：周三凌晨3:45‧有線61、64、201及203