全北入球 大平賣

猪拉多纳

李同國復出 干卡維斯回勇

亞冠盃E組應該唔會悶親你，南韓「阿二」全北汽車今晚喺主場招呼越南球隊平陽，入球大細中位數開到4.5球，都要追2.05倍大，因為全北「獅子王」李同國已經傷愈，而且平陽打法充滿土豪味道，鍾意懶醒盲目鬥攻，相信會再開入球騷。（now670台周二晚6:00直播）

雖然全北作客以4:1炒起FC山東嘅分組賽，隊長兼射手李同國因傷冇隨隊，但其實佢已經好番，日前全北喺韓職作客以2:1砌低FC首爾，佢更加有份後備落場，加上新加盟嘅射手干卡維斯，離開日職後重現効力史浩克04時期嘅功架，完全唔需要擔心全北會冇波入。
平陽唔踢死守波

事實上，李同國踢亞冠盃一向好醒，呢場喺主場球迷面前出戰，肯定會全力爭取佢個人今屆首個亞冠盃入球。至於干卡維斯，佢畀日本傳媒批評係水貨後，去到南韓踢番出超班實力，開咧戰對FC城南更加梅開二度，對家嘅越南球員身形輸蝕好難阻到佢入波。

另一方面，平陽喺分組賽兩連敗，包括上場作客以1:5慘負柏雷素爾，但大家咪以為佢哋知驚會死守，因為佢哋係越南土豪球會，陣中有唔少越南國腳，包括最出名嘅射手黎公榮，何況尼日利亞前鋒奧斯尼連續2場分組賽有波入，佢哋當正自己班霸，點會做衰仔死守呀？
亞冠盃賽制

現為分組賽階段，32隊分8組，每組4隊進行雙循環比賽，每組首名及次名晉級16強。