恒大半場速脫鹿角

猪拉多纳

簡Sir省招牌機會來了

意大利型男教頭簡拿華路今季首執教鞭，帶領中超班霸ＦＣ廣州（廣州恒大淘寶）爭逐各大錦標。「大簡」個帥位仲未坐穩，今晚喺亞冠盃H組主場迎戰近況頹爆嘅日職球隊鹿島鹿角，係證明自己實力嘅好機會，最好就半場速速搞掂對手，1.95倍半場勝博得過。

（now 671周三晚8時直播）

簡拿華路今季接替師傅納比做恒大主帥，球迷自不然拿兩位比較，但納比係冠軍級名帥，「大簡」就零執教經驗，不過咁唔代表佢冇料喎，話晒簡拿華路都係納比愛徒，點都學到師傅一招半式，況且接手恒大冇耐，點都要啲時間摸熟班球員特性，依家正係啱時候騷成果。

恒大近4戰錄得全勝，當中更包括兩場亞冠盃，咁嘅成績算係有交代，足以證明「大簡」愈教愈熟，但有人就話恒大贏得唔夠好睇，只係靠運，最近更傳出恒大將同「簡Sir」重簽合約，如果捧唔到亞冠盃，恒大有權提前解約。無論單消息係真定假都好，睇嚟簡帥都要快啲證明自己，塞住其他人把口。

好彩恒大今場對住近況頹到冇朋友嘅鹿島鹿角，絕對係大勝一場增強士氣好時機。鹿角開季後4仗全敗，主力前鋒達維又重傷要抖一排，想買嘅維多利亞首席射手甸尼爾又因傷未能加盟，真係人衰行路打倒褪，主勝得1.47倍太熱，不如博恒大半場捉鹿好過。
飛腳求開齋焗做大騷

至於F組就有另一支日職代表大阪飛腳主場對泰國武里南聯，飛腳喺分組賽兩戰全敗，為保出線機會今場不容有失，肯定會喪攻對手，武里南聯亦唔會坐以待斃，大盤有望。

（now 670周三晚6時直播）