前鋒火力猛 摧毀山神

猪拉多纳

大久保嘉人場場士哥

今日有兩場日職直播賽事，細鬼睇中山形山神主場對川崎前鋒呢場波。山神開咧兩戰全敗，球隊雖然啱啱喺日職盃贏波，但表現只係一般，面對近期火力強勁嘅前鋒，就算有主場之利都未必頂得住，前鋒雖然剛喺日聯盃輸波，但細鬼睇好佢哋可成功止跌，捧客W。

（有線61及201台周日下午6時直播）

前鋒上輪聯賽主場以2比2打和神戶勝利船，周中嘅日聯盃更以1比3輸畀名古屋鯨魚，狀態似乎麻麻地。不過佢哋近期入球率相當驚人，近3仗入咗6粒，當中以開咧後連續3場取得入波嘅前鋒大久保嘉人最弗，加上有上季喺日乙入咗19球嘅船山貴之加盟出任「超級後備」，縱然呢場波有後衞山越享太郎左膝受傷要缺陣，而中場大島僚太被日本U22徵召入伍無法上陣，前鋒仍有力可擊敗山神。
主隊聯賽2連敗

主隊山神上場聯賽作客不敵浦和紅鑽，日職錄得兩連敗，雖然周中嘅日聯盃贏咗清水心跳，但表現唔算好。事實上，山神今季重返日職，陣容冇乜點增強到，細鬼認為佢哋唔係咁易去延續贏波走勢。上季喺日乙攻入6球嘅川西翔太雖已傷癒可以復出，但球隊仍有中場山田拓巳、後衞渡邊廣大及宇佐美宏和因傷缺陣，至於秘魯中場羅美路法蘭克亦上陣成疑，今仗有主場之利都唔易打，細鬼推介前鋒今仗作客可以贏波，入球大亦值得支持。