皇馬立立亂巴塞齊心開W

猪拉多纳

西班牙「國家打吡」殺到埋身喇！巴塞隆拿今晚喺魯營球場硬撼皇家馬德里，位列榜首嘅「地上最強」暫時以1分力壓「銀河艦隊」，呢場冠軍前哨戰絕對係6分波，一定夠晒激。巴塞近況好之餘又夠團結，美斯亦重拾巔峰狀態，有力痛宰呢排內部立立亂嘅皇馬，報番首循環一敗之辱，撐巴塞捧2.6倍「讓球主勝」。

（now632台周一凌晨4:00直播）
美斯戒Pizza 3場勁入5球

巴塞剛啱喺歐聯淘汰曼城晉級，查實呢場波唔算太大壓力，「地上最強」一直佔上風，如果唔係祖赫特有好表現，隨時炒「藍月亮」曼城幾球啦！「MSN」組合件件腳風勁順，當中近3仗勁入5球嘅美斯，被踢爆聘用意大利營養師執過份餐單，兼且戒埋Pizza，怪唔之踏入2015年脫胎換骨啦！首循環對皇馬時，巴塞整體狀態唔算好，又遇着當時Fit到漏嘅皇馬，結果輸1:3，今晚似係風水輪流轉。
域陀華迪斯 古迪打賭 碧咸撐「艦隊」贏2:1

呢場大戰全球矚目，兩軍舊將域陀華迪斯同古迪賽前打賭，邊個嘅舊球會輸波，就要去對方嘅城市廣場自拍。「萬人迷」碧咸賽前貼皇馬贏2:1，統計又指莫迪歷同卻奧斯齊齊擔正嘅話，皇馬贏波率高達80%。之不過張峰就同前皇馬教頭舒斯達一樣睇好巴塞，其實大家有眼見，「銀河艦隊」自從捧走世冠盃後未好過，近期對維拉利爾同畢爾包都要失分，咁嘅狀態點同巴塞鍊先？

雖然上仗加里夫巴利梅開二度幫皇馬贏波止血，但王牌C朗全程黑面，擺明兩個唔咬弦，一來C朗個勢唔夠死對頭美斯猛，二來又盛傳佢同「大聖爺」有心病，《馬卡報》尋日直情話佢可能有機會走人添。最惡搞嘅係，連隊長卡斯拿斯同守將艾比路亞亦鬧不和，內部亂過亂世佳人，去到魯營點夠齊心嘅巴塞踢呀！
Data King：近6次交手最少入3球

‧雙方近6次交手，總入球起碼3球或以上。

‧巴塞係今季西甲入球王，27輪聯賽入咗78球。

‧皇馬近5仗只曾試過1次半場領先對手。
乜都玩錦囊：皇馬唔識守3.5球照玩大

「MSN」呢期着晒火，美斯更加勒都勒唔住，以球隊近6場勁入17球嘅走勢，今場唔似會少波入。況且皇馬遇着火力有番咁上下嘅球隊例必出事，最佳例子係早排主場失咗4球畀史浩克，相信「BBC」入幾多球都隨時唔夠後面輸，中位數3.5球嘅2倍大玩得過。
盤路解碼：今季巴塞「讓球主客和」盤路15勝5和7負。