C朗巴利鬥騷哥利累死皇馬

猪拉多纳

假如上周中你有欣賞巴塞對曼城的比賽，你就會明白球王同球星有乜分別。美斯將曼城一眾球星玩弄於股掌之中，踢出近年來最巔峰的狀態，如果不是祖赫特有神級演出，曼城早已被巴塞狠狠羞辱一番。巴塞近30場勝出27場，MSN場均入球更達到1.91球，現已成為巴塞史上最強攻擊組合。
銀河艦隊體能有優勢

皇馬球員質素不下巴塞，但踏入2015年後，踢來無厘神氣，連歐聯8強抽籤亦碰到今季6次對碰未嘗一勝的剋星馬體會，注定前路難行。傳媒及球迷對皇馬的成績一向要求極高，早前將C朗開生日派對的新聞無限放大，而加里夫巴利與C朗的不和更成為大眾焦點。兩人為求擺脫批評，落場自然要盡「騷哥利」，「走到位唔交，有波自己踢」最終更拖累整隊戰績。

雖然形勢下風，但我對皇馬又不是看得太淡。大家都知假如皇馬今場輸波，教練安察洛堤季尾必炒無疑，始終球員一向支持安帥，大戰當前必定走多兩步。況且巴塞周中才惡戰一場，皇馬體能始終有優勢。只要能夠壓縮美斯活動範圍及切斷其斜傳，蘇亞雷斯及尼馬將供應大減，「BBC」就有望偷雞，巴塞未必可全取3分。

（now632台周一凌晨4:00直播）