燕豪芬唔使讓趁早落「飛」

猪拉多纳

荷甲 21:30 （日）22 飛燕諾 Vs 燕豪芬

燕豪芬今季喺荷甲一支獨秀，今晚佢哋作客聯賽「3哥」飛燕諾可以睇定嚟踢，相反主隊為爭踢下屆歐聯焗攻形勢被動，平手盤一於捧1.95倍嘅燕豪芬。

（now670台周日晚9:30直播）

燕豪芬目前喺荷甲27戰得70分，分別拋甩2、3位嘅阿積士、飛燕諾11分同19分，荷甲踢到依家得番7輪，燕豪芬奪標機會可謂高唱入雲。事實上佢哋無論進攻定防守均屬荷甲最強，尤其今仗幾近夫添出擊，就算作客都唔可以睇低佢哋。要留意燕豪芬今季所輸嗰3場聯賽，全部出現喺歐霸盃前後，幸好佢哋喺上個月喺歐霸盃出咗局，今晚可以繼續喺荷甲橫行，平手盤坐和望贏。

至於想打入下屆歐聯嘅飛燕諾，今戰要搶分唔攻唔掂，不過呢班波火力麻麻，連中游嘅烏德勒支入波都多過佢哋，想攻破燕豪芬大門唔係易事。況且呢班波歇冬後主場6戰得1場零封對手，防守有隱憂好難全身而退。