祖雲達斯強細狙擊熱拿亞

猪拉多纳

唔齊腳勒住踢

「一哥」祖雲達斯今晚意甲主場對住熱拿亞，應該會趁住躋身歐聯8強嘅氣勢食住上，不過射手艾華路莫拉達同中場保羅普巴缺陣，聯賽又有14分領先優勢，唔齊腳隨時勒住，寧博2倍入球細。

（TVB301周日晚10:00直播）
莫拉達 普巴缺陣 火力削弱

日前祖雲達斯喺歐聯作客以3:0打沉多蒙特，「野獸」泰維斯攻入兩球又有助攻，表現的確係醒，但佢其實有啲傷，返到聯賽照計唔會踢得太搏命，加上艾華路莫拉達停賽，保羅普巴又打埋柴，今場「斑馬兵團」嘅攻擊力難免受到削弱，唔好忘記，最近佢哋喺聯賽對住中游隊伍薩斯索羅同巴勒莫，都係贏1:0收貨。
近6次對賽 5度開細

另邊廂嘅熱拿亞，上個禮拜喺主場以0:2不敵基爾禾，結束5場聯賽不敗走勢，而且今仗仲有中場耶高法爾基同埋湯馬士連干齊齊坐波監，陣容不整作客都靈梗係「守」字行頭啦，何況兩隊近6次對賽，就先後出現5次入球細，建議大家無謂冒險玩入球大，始終「意大利門神」保方失球數字偏低，唔容易開入球騷。