南錫踩油衝散歐塞爾

猪拉多纳

今日賽事唔多，阿King就搵咗法乙南錫對歐塞爾一戰嚟做過關重心，南錫雖然升班機會渺茫，但並非完全無望，冇理由咁快就舉白旗投降，陣中嘅摩洛哥老將尤素夫夏積近期持續有好表現，南錫今仗喺主場出戰，面對實力唔強嘅歐塞爾只係讓平半，上盤博得過。

（周二凌晨3時30分開賽）

南錫喺國內絕對唔係一支奪冠無數嘅名牌球隊，不過最威水就係現任歐洲足協會長柏天尼球員時代成名於南錫，為南錫上陣181次入咗98球，仲攞過一次法國足總盃。講番近幾年嘅南錫，都仲有得喺法甲生存，但去到上季就降班到法乙。目前排緊第9位嘅南錫仲剩番十場聯賽，升班機會渺茫係咪代表球隊就此放棄？梗係唔係喇，呢個世界係有奇蹟嘅，一於撐南錫嘅奇迹之旅由今場對歐塞爾開始喇！歐塞爾實力係有限公司，今場又有鋒將拿巴因傷缺陣，相反南錫就有前鋒尤素夫夏積頻頻士哥，上盤值得一博！
紐倫堡讓唔起波琴

另外今夜仲有兩場德乙同葡超獨腳戲，先開波嘅係紐倫堡主場對波琴，紐倫堡近四主場僅得一勝，入波又少，主場出戰都冇優勢，不如博吓有大勇前鋒施斯達克坐陣嘅波琴仲好，讓球客勝要得過。最後葡超就有塞圖巴爾主場迎戰費利拿，塞圖巴爾依家急需搶分護級，應會採取主動進攻搶攞三分，大盤值捧。