波圖基沙請客開大餐

猪拉多纳

哥連泰斯冇氣冇力

聽朝巴省聯獨腳戲，哥連泰斯主場恭候波圖基沙。今季巴省聯剩低兩支不敗之師，哥連泰斯係其中一隊，今輪主場出擊本應睇高一線，弊在佢哋有中後場孖寶被國家隊徵召，同時撞着「地獄賽程」，加埋最近防線表現明顯跌Watt，咁多不明朗因素制唔過，首選受讓嘅波圖基沙「讓客」之外，不妨博埋個入球大。

（開賽時間：周三早上6:30）
哥連泰斯8日踢4場

哥連泰斯由尋日作客卡比華蘭奴開始，8日內要連踢4場巴省聯，賽程惡啃成咁，教頭迪迪難免要輪換應付，但可惜後衞法比奧山度士傷膝繼續抖，中後場雙星伊利亞斯文迪斯同後衞基爾施華亦被巴西國家隊徵召，削弱咗板櫈深度。換句話講，迪帥搵啲二打六輪換嘅話，隊波演出隨時走樣，如果唔輪換嘅話，球員體力未必頂得住，真係勁惡搞。
波圖基沙作客叻過主場

再講吖，連同自由盃及巴省聯在內，哥連泰斯今季頭13場僅失3球，但佢哋近兩場竟然連失3球，防線表現走晒樣，就算鋒線有荷西古里路孭飛，隨時前面入埋唔夠後面失。論戰績，雖然波圖基沙及唔上哥連泰斯，但值得留意嘅係，佢哋踢作客醒過踢主場，今季兩場勝仗都係作客取得，5戰夾埋攞到2勝2和1負，更何況前鋒馬菲奧斯蘇沙同中場里奧哥斯達近排腳風奇順，佢兩個近4場聯手貢獻4球，今場波絕非任人魚肉，作客有望全身而退外，隨時同哥連泰斯駁火都似。