勝利爭常規賽冠軍唔放水

猪拉多纳

澳職常規賽開始步入尾聲，波友們要留意邊啲球隊仲要出力搶分，邊啲球隊準備放暑假，以免自己有損失。暫排次席嘅墨爾本勝利仲有機會挑戰常規賽冠軍，佢哋今日晏晝主場迎戰得番數字上有機會入季後賽嘅中岸水手，就算有主力球員被徵召踢太公波都冇有怕，讓一球下2.22倍「讓主」博得過。

（有線64及203周五下午4:40直播）

墨爾本勝利暫時落後打多場嘅「一哥」威靈頓鳳凰4分，只要贏咗呢場波，常規賽盟主名銜花落誰家尚係未知之數，點到班波唔搏。雖然前鋒干洛皮恩、巴巴路西斯等人要為國效命唔踢得，好在仲有首席射手貝利沙壓陣，呢位阿爾巴尼亞前鋒近5次鬥水手夾埋射入對手4球，擺明係剋星，呢鋪話唔定又開餐都似。
水手作客腳軟未開齋

另邊廂嘅水手家陣落後第6位嘅墨爾本城10分，想踢季後賽席位機會渺茫，班波落到場仲有幾多鬥心真係冇人知。何況水手作客向來水到痹，今季10戰錄得6和4負，成為澳職唯一一支作客未贏過嘅球隊咁肉酸，加上守將史唐路斯、米高尼爾又唔踢得，邊擋得住上下一心嘅勝利先？