伯頓染紅乘勝追擊

猪拉多纳

利物浦兩借將助拳衝甲

好多年輕小將都會借去低組別球隊攞多啲比賽經驗博上位，而同時低組別球隊亦成日靠借將增強實力，希望借到潛質新星。英乙榜首伯頓最近喺利物浦借得兩名年輕球員，分別係中場積克鄧恩同後衞奇雲史超活，狀態大勇嘅伯頓多咗佢兩位，今晚主場對史提芬納治，主勝唔怕追！

（TVB 301周二凌晨2時45分直播）

由前荷蘭名將哈索賓基領軍嘅伯頓近4仗全勝，其中有3場係入到兩球或以上，班球員咁弗，今場要再下一城非難事。伯頓最近仲喺「紅軍」借到20歲嘅積克鄧恩同21歲嘅奇雲史超活，球隊直升英甲可謂形勢大好。
史提芬納治識搓唔識射

呢兩位「紅軍」小將唔單止有潛質，兩人同時都可勝任多個位置，司職後衞嘅史超活同時可以踢中場，而鄧恩仲犀利，可以話係前場「通天老倌」，搵佢踢進攻中場、翼鋒或者前鋒都冇問題，佢喺今年一月曾外借去英乙包尾大幡車頓咸，踢咗5場就入咗3球，證明咗自己可以喺英乙立足，伯頓今場就算唔派佢正選上陣，做後備殺手都對哈索賓基戰術調動絕對有幫助！

講開對手史提芬納治都有單趣料，佢哋主場對杜根咸一戰，客軍中場尼柏迪突然狂咬史提芬納治守將朗尼亨利，英足總事後以暴力行為罪起訴呢位「翻版阿蘇」。史提芬納治喺呢場波雖控制大局，可惜冇球員識將個波送入網，搞到最尾輸波而回，今場對住狀態咁掂嘅伯頓，整定冇運行。