札幌黑匕首 追斬不死鳥

猪拉多纳

往績係就係輸晒呀，但係札幌岡薩多今季大幅增加投資，人強馬壯，今日响日乙主場迎戰京都不死鳥，平手盤有機會開出1.88倍主勝，唔博等幾時？

（開賽時間：周三晚6:00）

札幌呢支北海道球隊啱啱公布咗財政狀況，由於呢3年廣告收入大增成36巴仙，連續3年有盈餘，所有債務抵清晒不特止，仲有1,575萬日圓（約101萬港元）剩低，今季應該攞到日職參賽特許證，只要戰績掂就可以升班。
京都出閘脫腳

正因為早就計過數，知道升班唯一最大障礙─欠債，終於消除，札幌今季好肯使錢擴軍，甲隊嘅軍費由舊年嘅3.9億日圓上調到5.15億日圓（約3,326萬港元），所以搵到稻本潤一返嚟拍住小野伸二，重組昔日日本國家隊黃金中場，仲由岐阜撬埋件日乙Top Class射手拿沙列返嚟，計實力攞唔到頭兩名都夠資格入升班附加賽。

雖然近5次對戰都贏唔到京都，小野伸二打柴有排未出得，保拿奧上場對大宮松鼠仲做埋「紅牌阿姑」，都倉賢、前田俊介兩件中前場攻擊球員出唔出得都未知，但係佢哋嘅鋒力相當唔錯，開季4場波入到5球，尤其稻本策動嘅長傳突襲，啱晒拿沙列嘅胃口，呢件黑匕首亦都入咗3球，連京都班人賽前都話要諗計搞掂佢兩位。

京都咁緊張唔係冇道理，事關往績始終係過咗去嘅事，幾叻都係Past Tense，反而佢哋今季出閘脫腳，開季得1勝1和2負，只係贏過隊跛嘅福岡黃蜂，就唔能夠唔到佢哋心驚。由於自知狀態曳，京都今日早就疊埋心水龜縮，呢啲波梗係揀主場兼主動進攻嘅札幌啦。