國家打吡隨時爆大鑊 法警加強維穩力度

猪拉多纳

法甲下周一凌晨上演國家打吡馬賽主場鬥巴黎聖日耳門（PSG）。過往兩軍對碰無論場內場外都打崩頭，除咗曾經因為騷亂導致有球迷傷亡，亦試過防止有激進球迷搞事而需要閉門作賽，今場勝負將會直接影響兩隊今季爭標機會，戰況肯定更加激烈，當地警察已經做好準備，防止再有球迷亂事發生。
PSG砌馬賽 傷兵好番晒

今季首度執教馬賽嘅阿根廷「狂人」教練比爾沙賽前刻意幫球員減壓：「國家打吡勝負固然重要，但就算贏波亦唔可以保證我哋攞到任何錦標。」PSG主帥白蘭斯則收到好消息，早前受傷嘅中堅大衞雷斯、馬昆奴斯哥利亞、右閘奧里亞、中場卡比耶及盧卡斯洛迪古斯已經全部康復，前鋒伊巴謙莫域亦保持大勇狀態，剛為瑞典出戰兩場歐國外轟入3球，強陣出擊大有不勝無歸之感。

踏入4月PSG可謂硬仗連勝，除今仗外，下周佢哋會喺法足盃4強硬拚聖伊天，月中又要同巴斯蒂亞會師法聯盃決賽，跟住到歐聯8強大戰巴塞隆拿，所以今仗係佢哋能否挑戰4冠王嘅第一個考驗。