阿仙奴主W高一線

猪拉多纳

利物浦「搶4」冇瓣掂

如果話曼聯同利物浦係死敵，咁阿仙奴同利物浦呢對就係歡喜冤家，雙方近年都冇力爭逐英超錦標，可謂同病相憐。不過曾喺2012年攞過聯賽盃冠軍嘅「紅軍」之前最鍾意攞阿仙奴「9年無冠」嚟做笑柄，而年年都殺入前4嘅「兵工廠」就寸利物浦唔係年年都有歐聯踢。今季兩隊又嚟爭搶歐聯入場券，已經踩行油啟動前四Mode嘅阿仙奴喺英超主場已豪取8連勝，今場喺勁爆主場面對瓣瓣都唔多對辦嘅「紅軍」，全取3分冇難度，簡單捧主勝！

（now 621周六晚7時45分直播）
史獨又整傷 焗靠反骨仔

上季季前阿仙奴玩嘢，開價4千萬零1鎊斟「紅軍」神鋒蘇亞雷斯，結果畀一眾利迷瘋狂恥笑，連老細約翰亨利都喺Twitter開Post寸爆班「兵工廠」高層係咪食咗大麻所以亂開價。買唔到「阿蘇」嘅阿仙奴今季再接再厲，有傳對「紅軍」新星史達寧有興趣，又估唔到史達寧呢個衰仔真係咁反骨，日前竟然喺訪問暗示「紅軍」又渣又孤寒，仲暗示願意入「廠」添！無啦啦喺今場前4關鍵大戰前夕講埋啲咁嘅嘢，一班利記球員軍心唔受影響就假，而會方更加係震怒，相信稍後會有秋後算帳。

不過講真，「紅軍」要雪史達寧都冇乜可能喺呢個時候郁手，史杜列治係正宗玻璃腳，上場對曼聯再次整傷，今場好大機會缺陣，其他前鋒好似巴洛迪利、列基林拔又靠唔住，領隊羅渣士應該都會再出無鋒「矮仔陣」，搵史達寧踢正前，菲臘比古天奴同拉爾拉拿就喺兩邊做配合。其實利物浦今場最大鑊唔係冇咗「史獨」或者隊長謝拉特，而係冇咗史卡迪爾，佢喺上場對曼聯因為踩人而被罰停賽3場，今場冇咗呢位鐵血中堅帶住班後防，面對住阿仙奴前線幾個傳得扭得射得嘅進攻球員，「紅軍」防線隨時被玩殘！
主場8連勝 基奧特弗爆

其實阿仙奴有雲格呢位「前四狂魔」領軍，要攞歐聯入場券真係好穩陣，嚟到球季尾段，「兵工廠」真係勢不可擋，近6場全勝，而齋計主場戰績更係8連勝，奧斯爾、艾朗藍斯、阿歷斯山齊士呢班主力都冇傷冇病，「銀河唯一」基奧持呢排更頻頻有士哥，「兵工廠」近兩次主場對住「紅軍」都順利贏出，今場再下一城應該問題不大！