拉素打卡保三甲

猪拉多纳

同如火如荼嘅各大聯賽相比，上周國際賽期生意淡靜得多，大戶們按兵不動，就算散戶都唔太熱衷，由於下年歐國盃擴軍至24隊，外圍賽每組頭兩名可直入決賽周，競爭程度大減，熱門往往讓得辣，但未必贏晒成個盤，肥叔認為呢類波小注怡情，千祈唔好瞓身去博。

啱啱打完國際賽，歐洲各大聯賽又重燃戰火，肥叔今晚重心場次係意甲卡利亞里主場對拉素，前者頻頻易帥，從施文到車仔名宿蘇拿，再翻兜施文，可惜愈換愈衰，近八場聯賽未嘗一勝跌到落尾三，隊波士氣點會好；相反拉素之前六場聯賽贏晒上到第三，好大機會搶到下屆歐聯入場券，為咗力保「錢」途，今仗撞正行緊衰運嘅卡利亞里，仲唔趁機大打落水狗咩？拉素讓到半一擺明有信心，照捧上盤。

（周六晚9時開賽）

李城等降班讓波必反

至於英超方面，包尾大幡李斯特城主場對韋斯咸，初盤開出李斯特城讓平半，純粹因為覺得佢哋要為護級搶分，以及「錘仔幫」韋斯咸踢緊風流波，不過想贏唔代表一定贏到，何況「李城」上次喺聯賽贏波，已經係兩個多月前嘅事，肥叔覺得呢班波氣數已盡谷唔起，想搏亦有心無力，點讓得起近三次碰頭都贏佢哋嘅韋斯咸呀？下盤有買趁早。

（now 623周六晚10時直播）
肥叔心水

拉素 上盤

熱拿亞 上盤

禾夫斯堡 大

韋斯咸 下盤

曼聯 上盤

史雲斯 上盤

西布朗 上盤

馬德里體育會 上盤

車路士 上盤

馬拉加 上盤