多蒙特 拜仁駁火演入球騷

猪拉多纳

德甲今晚上演重量級大戰！兩大名牌多蒙特同拜仁慕尼黑，今季成績差天共地，賽前兩隊積分差距多達31分，不過大家都好明白呢個並唔係佢哋實力真正差距，近期戰績上揚嘅「蜜蜂兵團」愈戰愈勇，奧巴美揚同馬高列奧斯呢對「蝙蝠俠與羅賓」火力強勁，主場出擊有力同鋒力No.1嘅拜仁鬥搶攻，今場1.73倍入球大冇走雞！

（有線61、64、201及203、中央5台周日凌晨0:30直播）
奧巴美揚弗爆7場入7粒

上半季飽受降班威脅嘅多蒙特，近7場聯賽狂搶15分後唔單止提早上岸，依家仲有機會爭入來季歐洲賽，當中7場射入7球嘅奧巴美揚當然居功至偉，佢身後有馬高列奧斯、香川真司同米希達利恩3部發電機提供彈藥，真係唔憂無波入。

拜仁慕尼黑唔知係咪喺榜首領先得太多，上場聯賽竟然主場輸咗畀慕遜加柏，事實上佢哋今場作客多蒙特後，仲要應付德國盃同歐聯等連場大戰，球員下意識想留力嘅情況下，落到場難免會有啲大意，不過拜仁進攻DNA已經入晒骨，就算兩翼列貝利同埋洛賓齊齊掛免戰牌，但羅拔利雲度夫斯基倒戈更加想入波騷吓QUALI！
阿拉巴重創影響防守力

拜仁賽前傳出後衞阿拉巴重傷消息，對佢哋嘅防守力有一定影響，事實上呢兩支着重進攻嘅球隊近兩季拍埋都有唔少入波，上季多蒙特同拜仁分別喺對方主場炒對手3球，今季首循環拜仁又喺主場險勝2:1，兩大死對頭每次對撼都想砌低對手立威，今場進攻意欲明顯，國家打吡撐「入球大」梗有計！
盤路解碼

拜仁今季45戰開出26口入球大，大盤率約58%。
Data King：多蒙特踢尾場未贏過

‧多蒙特喺對上6次德甲周六尾場出戰，錄得3和3負。

‧雙方係今季德甲起腳次數最多嗰兩隊，拜仁錄得363次，多蒙特則有336次。

‧拜仁近3場德甲作客至少攻入3球。
乜都玩錦囊：拜仁上盤幫哥帥創紀錄

呢場係拜仁教頭哥迪奧拿第61場德甲領軍賽事，只要今晚贏波，哥帥將成為德甲史上最快攞到50勝嘅教練，比舊紀錄嘅78場足足快17場，相信一班手足實識做，砌低「蜜蜂兵團」幫哥帥創紀錄，就算多蒙特呢次受讓平半都要唔過，揀1.78倍上盤。
頂占筍盤：多蒙特（入球大）